GALIZA | A Portavoz Nacional do BNG deixou claro que a idea de Beiras de concorrer ás europeas na candidatura soberanista non é “seria” xa que nin sequera existe unha proposta. Cabe lembrar que Antón Sánchez rectificou inmediatamente Beiras matizando que Anova “non ten ningunha decisión” ao respecto.
Ler tamén:
Anova pretende sortear a grave crise de En Marea ofrecéndose á candidatura do BNG
BNG, Esquerra e Bildu apresentan candidatura ás europeas en Compostela
“Para avaliar as propostas, estas propostas deben existir e ser serias. Non podemos avaliar propostas que non existen”, respondeu nesta quinta feira Ana Pontón á idea lanzada no día anterior por Beiras. A líder nacionalista deixou claro que non está disposta a facer o xogo a quen gusta “da lea, o espectáculo e as frivolidades cando falamos de cousas serias”.
“Non estamos para solucionar as leas de En Marea. Estamos para traballar polos problemas do país, para traballar con seriedade e rigor para os galegos”
Pontón sinalou que se En Marea ten un problema “eu non me vou meter” mais advertiu : “Os problemas de En Marea que non intenten trasladárnolos a ninguén”. A Portavoz nacionalista enfatizou que o BNG non está “para solucionar as leas de En Marea. Estamos para traballar polos problemas do país, para traballar con seriedade e rigor para os galegos”.
A Portavoz Nacional do BNG, que dixo non ter intención de entrar “en especulacións nin en leas nin en barullos” salientou que a coaligazón soberanista con ERC e EH Bildu está fechada pois será apresentada nesta sexta feira en Compostela. Pontón concluíu que esta alianza das tres nacións representa unha grande oportunidade para garantir a presenza da Galiza en Europa e “dar continuidade ao traballo desenvolvido por Ana Miranda”.
